گونئی تورکوستان

آتا دیلی

منیم اورییم‌دن اؤزگه شئی کئچیر،

ائی منی دونیایا گتیرن قادین !..

بو سیرری آچماقدا بلکه گوناه‌دیر،

منیم گوناهیمی، آنا، باغیشلا.

سن یئنه اوّلکی اوجا‌لیقدا اول.

اوغلونام، وئردییین جانا باغیشلا.

... بو دیلده سؤز دئسم، چاتار تانرییا،

چوخ‌لاری بو سیرری آنلامیر، ده ده،

بیز "بیزی" یاشا‌دان دیله یئنمیشیک،

بو وطن تورپاغی کیچیلنده ده.

دیلیمه "جان" دئدیم، جانیم دیلیمده،

ائی دیلیم، سؤزومو کؤمه یه گتیر.

مین ایل آچمامیشیق بیر سیرری، اوستاد،

گرک من دانیشیم بو حقیقتی.

- "آنامین کیتابی" چوخونا یاددیر،

دئیرم نه اوچون، صبرینی گَل باس.

-یورد بویو کَهَر آت اوینا‌دان‌لارین

آتاسی کیم اولوب؟

او اوزون حسه‌نین عکسی گؤزومده،

دولاشدی ار کیمی بو یورد بویونجا...

حالا‌لی، قادینی کیم اولدو؟!

- یاد قیزی،

اوتوروب آغلاییم، دیلیم، دویونجا.

الله،

داهیمی ده یاد قادین دوغوب،

مقدس دیلیمین روحون قیریبدی.

گؤرن نیظامینی، یا خاقانینی

آناسی نه دیلده دانیشدیریبدی؟

منیم اوجاغیمی کیم یاندیردی، کیم؟!

ائویمین قادینی یاد قادین ایندی.

اوغلومون آناسی دیلیمی بیلمیر،

اؤزوم ده، اوغلوم دا اؤزگه‌لرین‌دیر.

یاد قادین نازینا یئنن میللتین،

باشینا نه گلیر، نه گلیر آزدی.

بابک اؤز اوغلونون خیانتینی

یاد ائلدن آلدیغی قادینا یازدی...

بیلدی کی، خیانت او قان‌دان گلیر،

اوغول منیم دئییل، دئدی: - یاددی، یاد.

نییه باجارمیریق توبه ائیله سک،

یوخسا اونوتموشوق او درسی، اوستاد!

... بؤیوک بریتانیا... لوندون جیواری...

گتیریلیب یئدَکده قاراباغ آتی.

دویوب یادلیغینی بو آت مادیانی

گؤزل مادیان‌لاردان اوزاقدا یاتیر.

هارداسان، اوغوزون مقدس روحو؟!

گل، منی تمیزله، کدر، ائی کدر!

یادلا بیر یاستیغا باش قویان‌لارین

قئیرتی یوخمودور - کهر آت قدر؟!

... گرک دده قورقود، گون تَکین بابام،

تزه‌دن اوز توتام یازینا ایندی.

آتا کیتاب‌لاری اونوتدوغوم‌دان

اسیرم یاد قادین نازینا ایندی.

هانسیسا بار نامرد حؤکمدار دئییب،

بوگونکو مقصدین دئییب چوخ قیسا:

"توتدوغو اوبا، یورد توتانین دئییل،

قادینی او یئره وارماییبدیسا".

دوشمنیم ائویمده گزیر مَلَک تک،

ایچیم‌دن ییخا‌جاق منی لاپ صاباح.

هئچ کیم سیاستی بو جور آغیل لا

حقیقت دونونا بوکممز، الله!...

هئچ کیم تابلاشامماز بو درده، هئچ کیم،

بس بیزی یاشا‌دان نه سیرمیش، نه سیرر؟!

نه یاخشی منه دوست کاغیز-قلم وار،

نه یاخشی اؤنوم‌دن آدام‌لار کئچیر.

دوروب سوروشورام: - آدین؟ جاواب یوخ...

- میللتین؟

آنلامیر، نه قریبه ایش!

آتاسی - محمد، آدی - اوغوزدو؛ -

بئشیکده یاد میللت سودونو اممیش...

سن‌دن سوروشورام: - آنانین آدی؟

دیل‌لنیر: - وئرا‌دیر؛ سنین؟ - آنوش‌دور.

سنینکی ایننا‌دیر! دیلیم، جان دیلیم،

گؤردونموصاباحین اؤلومه توش‌دور.

یوخ! یوخ! محببَته سد چکمیرم من،

قنیمم، دیلیمه کیم کی، قنیمدی.

کَرَمین دیلینده کَرَمه "جان-جان"،

سنینله بؤیویم، وارام، جان دیلیم،

منی سؤزلری‌نین باشینا چئویر.

سنه یئنمه‌لی‌دیر منی سئوَن کس،

یئنیرسه، دئمه‌لی اورک‌دن سئویر.

روحوم بدنیمده اذیت چکیر

روحوم بدنیمده اذیت چکیر ،

دیلیمده سؤزلره چئوریلیر آهی ......

گوناهکار جانیمدا من‌دن خبرسیز

قفس ایچینده‌دیر روحوم، ایلاهی!

گوناهکار جانیمدا گوناه‌سیز روحوم،

ندن‌دیر همیشه گؤی‌لره باخیب،

منی نیه قویمور راحت یاشاییم؟

من ده اؤزگه‌لر تک آدامام آخی !

من ده اؤزگه‌لر تک آدامام آخی...

منیم ده جانیمدا حسرت، سئوگی، قم...

بو اوجاق قایغی‌سی، بو ائو بو اوشاق...

قورخورام روحوما قوشولوب گئدم.

قورخورام روحوما قوشولوب گئدم...

گئدم گؤی اوزونده تمیزلنم من.

نییه بوراخمیرسان گوناهکار جانیم،

دئ نییه قورخورسان تمیزلی یین‌دن؟؟؟

دئ نییه قورخورسان تمیزلیگین‌دن؟

نیه آدام‌لارین هر اوزو بئله؟!

بو دونیا، بو دونیا اؤزون‌دن قاچیر،

گوناه ایچینده‌دیر یئر اوزو بئله.

ائی روحوم یاشاما گوناه ایچینده...

اونسوز دا بیلیرسن بو باش، ال ندیر؟

ائی منی اؤلدورمک ایسته‌ین آدام،

روحوم گؤی اوزونده، جانیم الده‌دیر.

روحوم بدنیمده اذیت چکیر،

دیلیمده سؤزلره چئوریلیر آهی،

گوناهکار جانیمدا من‌دن خبرسیز

قفس ایچینده‌دیر روحوم، ایلاهی!